Un erro que prexudica substancialmente á comunidade autónoma galega, por máis que poida beneficiar a economías ben consolidadas de Galicia cuxos titulares desbotan a existencia de riscos medioambientais, cometido polo goberno galego e que cómpre non secunde o central. Un erro de graves consecuencias contra o que se van manifestar os galegos, nomeadamente os habitantes da cara norte da Ría de Arousa, porque os vertidos desa macrofactoría ao río Ulla e, a través deste, á ría arousá, atenta contra a saúde (poderiamos dicir contra a vida?) de milleiros de persoas que habitan os concellos que circundan o municipio de Palas e aqueles que o Ulla rega ata a súa desembocadura nunha ría que identifica á comarca arousá e que proporciona maos seus habitantes traballo, medios de vida e o orgullo necesario de seren galegos da Arousa.
Un permiso concedido pola Xunta que preside Alfonso Rueda (o home tranquilo de Núñez Feijoo) á macrocelulosa de Altri para levantar en Palas un complexo de celulosa e téxtil que Galicia non precisa e nunca pediu, farta xa de eucaliptos e lasta de celulosa elaborada na ría de Pontevedra dende fai máis de 50 anos.
Un permiso que Portugal negou a Altri e que, por submisión ou erro sabido a Xunta asume caladamente. Erro?… dito así semella ser unha opinión máis en contra da macropranta de Altri, mais cando esa opinión procede de quen foi a máxima responsable de innovación forestal da Xunta ata o mes pasado, Mercedes Rois, a valoración adquire uns outra dimensión.
Porque Mercedes Rois, enxeñeira de montes, é unha experta que, na opinión sobre o caso, súmase a outros moitos compañeiros que, obviamente, pensan o mesmo: un erro a pagar por Galicia e os galegos.
A polémica en relación coa fábrica de Altri medra. E chega a un punto crítico debido á declaración de impacto ambiental (DIA) que, con carimbo favorable, outorgou o goberno galego o pasado venres a ese, cando menos, complicado proxecto de difícil dixestión e sumamente dado o mesmo á non ben entendida explicación dende a legalidade do feito.
Mercedes Rois, exdirectora da Innovación da Axencia Forestal, advirte das consecuencias “sin precedentes” e “irreversibles” para o medio ambiente e a identidade cultural da comunidade autónoma, formulación que evidentemente entra en colisión co que a Xunta -sen dúbida movida por outros intereses- non tivo nen ten en conta.
A proximidade da fábrica ao Camiño de Santiago e a Serra do Careón e o seu impacto no río Ulla e a Ría de Arousa na que desemboca, causan unha moi fonda preocupación
no País e ven ser unha “triste nova” agrandada pola decisión da Xunta de autorizar á pasteira lusa a seguir avante co seu proxecto. Este sábado, os concellos da beira norte da ría arousá deixarán testemuño claro e contundente da súa posición a este respecto, cunha manifestación que, en conxunto, apoiará un rotundo NON A ALTRI.