L'Autoridá Portuaria de Xixón instalará seis estructures arrecifales esperimentales, distribuyíes ente'l cai deportivu y el cai comercial pa que sirvan de soporte pa la colonización de diferentes especies marines, pa crear nuevos hábitats y pa medrar la riqueza biolóxica del mediu.

Coincidiendo cola celebración del Día Mundial de los Océanos, l'Autoridá Portuaria de Xixón dio anuncia d'esti "proyectu precursor" col que quier impulsar la biodiversidá marina nel agua d'El Musel y averar a la ciudadanía'l conocimientu de los ecosistemes que viven nel entornu portuariu.

Amás de favorecer el desendolcu de la biodiversidá, el proyectu dexará analizar y comparar el comportamientu de distintos materiales y diseños p'afitar cuálos ufierten meyores condiciones pal inxerimientu y medría de comunidaes marines.

Los resultaos contribuirán a ampliar el conocimientu científicu sobre los procesos de colonización biolóxica n'entornos portuarios y sobre les midíes que puen favorecer la rexeneración ecolóxica d'estos espacios, según señala l'Autoridá Portuaria nun comunicáu.

Ún de los aspectos más innovadores de la iniciativa sedrá la so dimensión divulgativa, porque l'Autoridá Portuaria de Xixón desendolcará un programa de siguimientu y comunicación que dexará a la ciudadanía ver la evolución d'estes estructures y descubrir qué sucede baxo la superficie del agua.

Al traviés d'imáxenes submarines, conteníos divulgativos y acciones de sensibilización ambiental, los ciudadanos podrán conocer cómo diferentes especies colonicen progresivamente les estructures arrecifales y cómo se construyen nuevos ecosistemes marinos.