Astilleros Gondán firmó un nuevu contratu pa la construcción d'un buque ensin tripular que va tar dedicáu a misiones de caltenimientu ya inspección submarina. La embarcación, que va operar n'agües de Noruega, va tener 24 metros d'eslora y, ente les sos característiques, la compañía naval castropolense destaca que "va ser quien a amenorgar les emisiones de Dióxidu de Carbonu en más d'un noventa por cientu en comparanza con buques offshore convencionales". El barcu va construyíse n'As Figueiras y va tar rematáu en 2025.
La firma figueirense amuesa'l so "entusiasmu" por participar na construcción d'esti buque "de vanguardia" encargáu por USV, empresa formada por DeepOcean, Solstad y Ostenjo Rederi, col que Gondán tien una llarga trayectoria de collaboración. El buque va tar diseñáu pola firma noruega Salt Ship Design.
Gondán esplica que'l buque va tener capacidá "pa operar remotamente a distancia dende un centru d'operaciones en tierra". Nesti sentíu, va tar equipáu con un sistema de sensores a bordu que va permitir "entamar d'un xeitu eficiente trabayos d'inspección submarina por aciu del llanzamientu y recuperación de vehículos operaos por control remotu capaces de somorguiase hasta 1.500 metros de fondura". La compañía de Castropol destaca amás l'autonomía del barcu, preparáu pa trabayos nel mar d'hasta trenta díes. Esta autonomía, amiesten, consíguese gracies a "un sistema de propulsión híbridu diésel-eléctricu con bateríes, que va garantizar una operatividad allargada y una mayor eficiencia nes misiones de caltenimientu ya inspección submarina".